يا مصر هانت وبانت.. كلها كم يوم
نهارنا نادي، ونهار الندل مش باين
الدولة ما فضلش منها إلا حبة شوم
لو مش مسدء تعالا عالميدان عاين
يا ناس ما فيش حاكم إلا من خيال محكوم
...والي هيقعد في بيته بعدها خاين
الي هيقعد كإنه سلم التانيين للأمن بإيديه.. وقله همه ساكنين فين
وصلت لضرب الرصاص عالخلق في الميادين
حتى الجثث حجزوها اكمنهم خايفين
يا مصر أصبحها أحياء وميتين.. مساجين
فـ اللي هيقعد في بيته يبقى مش مفهوم
والي هينزل .. إلهي حارس وصاين
يا مصر هانت وبانت.. كلها كم يوم
نهارنا نادي، ونهار الندل مش باين
نهارنا نادي ... وبإيدينا على فكرة
الصبح عنده فضول رح نعمل إيه بكرة
إيده على الباب، وخايف يلمس الأوكره
أدخل يا أستاز براحتك.. والبلد حرة
إحنا زهقنا نشوف الصبح من برة
أدخل، وخرّج بقايا العتمة بالمرة
الناس دي حرة.. وجنود الأمن مضطرة
يا صبح .. طلّلعت روحنا لأجل تيجي يا خي
طالعين نجيبها أهو.. في كل حارة وحي
حتى ولو ضربونا بالرصاص الحي
شوف المداين كدة ... مفروشة خلق وضي
دايماً مفاجأة... ودايماً وقتها معلوم
الحكم لينا، وليكي الحق يا مداين
يا مصر هانت وبانت، كلها كم يوم
نهارنا نادي، ونهار الندل مش باين
يا صف عسكر.. بدال الدرع شيلوا اتنين
25 يناير، يا شباب فاكرين؟
كان في انجليز.. ووزير الداخلية تخين
كان عنده برضو عساكر زيكم جامدين
سابهم يموتوا علولا لو سأل فيهم
كانوا شبهكم.. أساميكم أساميهم
يا عسكري... البهاوات الي بتحميهم
ممكن يردوا عليك لما تناديهم؟!!
يا عسكري.. أنا أصلي بس بستغرب !!
لو لاقي تاكل وتشرب، قوووووم يا عم اضرب !!
اضرب... عشان الوزير من ضربتك يطرب
لكن، هتشتغل إيه؟ .. لما الوزير يهرب
أما الشديد القوي.. القادر أبو القادر
برميل تلامة ... نشأ على مصر من الآخر
لو شافته معددة.. تكتب أدب ساخر
ثابت... يقول للهرم: يا كابتن اتّاخر
ولم يزل معتقد إنه الهرم هيقوم !!
آدي البشر والحجر قايمين يا سيد القوم
والدين هيترد .. ياللي عشت متداين
يا مصر هانت وبانت.. كلها كم يوم
نهارنا نادي، ونهار الندل مش باين
ده حكم أسرة، ولا خوفو ولا خفرع
ولا وجع بطني يتعالج بزيت خروع
عمل مسوجر بعيد عنك.. ولا يطلع
جربنا فيه كل شيء، ما لقينا شيء ينفع
ما طلعش بالأدوية.. جربنا ألف طبيب
ولا بعطارة شيوخ، ليهم بلح وزبيب
ولا بجحفل مغولي، وضرب بالقباقيب
عمل مسوجر وسفلي.. شغل تل أبيب
وشغل أمريكا متغلف، وختمه عليه
ضيف زارنا يا عم من غير دعوة، لابس بيه
قعد تلاتين سنة ، ما بيقولش قاااااااعد ليه !!
والنيّة يديها لابنه النابغة بعديه
ويقول قضا وقدر بين البشر محتوم
قلناله طيب.. ومين قال القدر معلوم ؟!
وايش عرفك يا فخامتك بالذي كاين !!
يا مصر هانت وبانت.. كلها كم يوم
نهارنا نادي، ونهار الندل مش باين!!
لمن يرغب بمشاهدتها عاليوتيوب هنا
المشاركات
ليست هناك تعليقات:
إرسال تعليق